Un sentimento inexplicabel
Dia di tata ta diadomingo awor, asina nos di Phryme Magazine a interview un tata hoben pa splica nos tocante su bida. Christian Soto Garcia, cual ta hefe di redaccion di prensa Bon Dia Aruba, a combersa un rato cu Phryme Magazine.
Christian a bira tata tres aña y mei pasa ora cu e tabata tin 26 aña di edad. E ta splica nos con e la sinti pa tin su baby den su man. El a conta cu henter experiencia di embaraso e la cuminsa prepara caba cu su pareha te ora e momento yega. Segun Christian e nervio ta ora e dia mes yega ta inexplicabel; e ta un sentimento cu bo ta sinti tur cos pareu. Christian ta conta cu ora e la yega hospital, e la bay cu paña di trabou, drenta camber fout dos biaha pa motibo di nervio te cu porfin e la drenta den e camber corecto. Ora cu e tabata cu su pareha e awa a kibra anto eynan e la ripara cu e situacion a bira realidad. Den e proceso ey Christian kiermen e la haci un joke cu e partera, "Mi lo yuda'bo deliver e mucha". Cual e partera a tuma e joke den serio y contesta cu ta bon e por haci esaki. E la haya handschoen anto partera a indica unda e tin cu pone su man y con e proceso lo ta. Christian ta splica ora e baby a cuminsa nace (cual e ta considera esaki zuiver) te cu e la sali, e tabata wanta e baby den su man el a vries completamente pero e ta considera henter e proceso te cu e tabata tin e baby den su man un, "Dushi feeling". E ta conta cu su di dos yiu tabata uno mas facil paso e tabata tin un conocemento di e proceso. Christian en total tin cuater yiu. Dos biologico y dos di su casa cual e ta considera di su mes.
Den e tempo aki Christian no tabata studia. E tabata traha na coolfm. Christian ta splica cu e tabata casi pa termina su studio, pero ora e la bay Aruba pa vakantie, e la wordo ofreci un ‘vakantie job’ anto di esaki a bira un ‘full time job’ y el a keda na Aruba. Nos di Phryme magazine a puntra si bira tata na un edad young por stop hoben studiando den algun manera of den ki sentido bida ta cambia. Christian su conseho pa studiantenan cu kier bira tata of ta den bira tata ta cu prioridad ta locual ta cambia, “Siña traha un budget. Cada placa di entrada mester tin su destinacion. E momento cu bo ta bira tata bo ta bira responsabel pa un otro bida, bo no ta responsabel pa bo mes mas. Un bida cu no por defende su mes, un bida cu ta dependiente 100% di su tata y mama. Mester ta consciente cu prioridadnan ta cambia door di e responsabilidad.” E kiermen un ehempel den e parti di trip, e ta bira cu no por sali trip tur ora paso e placa tin cu spaar e. Mester evalua si tin entrada financiero of si mester busca mas entrada. E momento aki mester tuma un decision den bida; si ta gasta placa pa pret of haci uzo di e placa pa e yiu cu ta dependiente di su mayornan. Esaki ta e motibo unda Christian ta kere hopi tata hoben ta pega di no por distingui dibiaha e responsabilidad, cual por trece diferente reto,
“E asunto financiero semper ta hunga un rol hopi grandi den un relacion ora cu tin un yiu, e carga financiero ta bira mas halto di biaha. Pero esaki no ta stroba abo di sigui bo studio en absoluto, ni stroba den sigui bo metanan. E ta supone di motiva'bo pa busca un miho porvenir.”
Kico tata kiermen pa Christian?
“No tin palabra pa splica kico un tata ta. Tata ta carga diferente pechi pa percura pa su yiu tin e miho bienestar. Un tata ta un protector, e ta un proveedor pa su yiunan, e ta un paña di consuelo. E ta role model, e ta hopi cos den uno. Manera nan ta bisa, tata no ta esun cu ta traha e yiu sino esun cu ta cria e yui. Den e cria ey ta bin hopi cos.”
Disclaimer: The views and opinions expressed in this blogpost are those of the author and do not necessarily reflect the official views of Phryme Magazine.
Note: Photographs are not of the interviewee