Students Campaign 2018 – Film, Send & Win!
Arubahuis, Phryme Magazine, Kompas y ATA Europe
Lansamento oficial di e campaña “Film, Send & Win!”
Den haag- Recientemente Phryme Magazine, conhuntamente cu Arubahuis, Kompas for students y Aruba Tourism Authority (Europe) a lansa oficialmente e campaña pa studiantenan cu ta biba na Hulanda di Aruba, "Students Campaign 2018." Un evento sumamente special cu a conta cu presencia di Ministro Plenipotenciario di Aruba señor Guillfred Besaril, director di "Arubahuis" y representante di diferente "Plaatselijke Opvang Commisie" aki na hulanda. Alavez, usando technologia y plataforma di Facebook na favor, a lanza e projecto aki live pa demas personanan tanto na Aruba y Hulanda.
Ta solamente algun luna atras cu Phryme Magazine a ricibi e invitacion di Arubahuis pa un reunion pa evalua e posibilidadnan di un futuro colaboracion. Despues di e reunion fructifero aki, Arubahuis a presenta e idea di un campaña specificamente pa studiantenan di Aruba cu ta biba na Hulanda. Tanto Phryme Magazine, Arubahuis y Kompas a cuminsa reuni regularmentepa discuti detayesnan p'asina por logra lanza e bunita campaña pa nos studiantenan bibando na Hulanda.
Desde di un inicio, Phryme Magazine semper a aspira pa traha conhuntamente cu Arubahuis. Mirando cu Arubahuis ta e instancia cu ta conecta tur studiante arubano aki na hulanda. Phryme Magazine ta un revista relativamente nobo, cual a mira e oportunidad aki pa crea y establece un relacion sustenibel cu instancianan di Aruba. E team di Phryme Magazine ta spera di lo por colabora y coopera cu mas instancianan local frecuentemente.
Despues cu reunionan pa discuti detayes di e campaña aki a inicia, Phryme Magazine a promove participacion di henter su team; cual ta conforma di studiantenan arubano bibando actualmente na Hulanda y Merca. Como un projecto di studiante, a mira e importancia pa participa activamente pa bin cu ideanan fresco y nobo pa cu e campaña aki. Esaki a resulta di ta un experencia nobo pa e team di Phryme Magazine, cual ta yuda engrandece e revista su conocemento y involucracion den mas futuro colaboracion.
“Film, Send & Win!” ta e producto final di e iniciativa di Arubahuis conhuntamente cu partners — cual ta un campaña cu ta brinda e oportunidad na studiantenan di Aruba cu ta biba y studia na Hulanda pa gana premionan atractivo dor di simplemente participa.
E campaña aki tin como meta pa entre otro; aumenta e participacion y conexion entre studiantenan di Aruba na Hulanda, genera informacion relevante di studiantenan experencia, genera un gran cantidad di studiantenan cu por resulta den embahadornan di Aruba durante e siman di introduccion na studiantenan nobo y hopi mas.
Con pa participa? Masha facil! Graba un video di bo mes no mas largo cu 90 seconde mencionando lo siguinte;
bo conseho pa studiantenan di Aruba cu ta desea di studia na Hulanda y tres puntonan di benta unico pa promove Aruba. Ora bo a caba di graba y edit bo video, subi ariba e pagina www.arubahuis.nl/students2018, lesa tur rekisito y si bo ta diacuerdo, “submit” bo video. Dor di participa, bo tin e chens di gana un di e tres premionan:
Un “round-way trip” pa Aruba;
Un bicicleta hibrido;
Un “goodie bag” di Aruba na balor di €300.
E campaña aki ta continua te cu 7 di juni 2018 - asina ta, invita bo amigo, famia y tur persona cu bo conoce cu ta biba y studia na Hulanda pa participa. Di awo caba, Phryme Magazine ta desea studiantenan partcipando hopi exito; sea creativo y sorpresa nos cu boso talento!