Sera bo boca
For di ora mi tabata hopi jong, mi mama semper a bisa mi cu cierto cosnan mi tin di tene nan pa mi mes.
E semper a bisa mi, "Nela, dia cu bo sinti cu bo tin cu papia over di algo, cu bo no por papia cu mi persona, skirbi’e riba un papel y despues der’e of kim’e, pero por lo menos bo a deshoga bo mes."
Eynan si mi mama tawata tin hopi rason.
Esey tabata un consejo, mane hopi, cu mi no a scucha for di dje.
Ta te ora cu mi a bira mas grandi ta cu mi a siña, cu tin biaha ora bo bisa hende of un amigo/a bo soñonan, aspiracionnan of ideanan, nan no ta tuma lugar of si e pasa, cosnan ta sali robes of asina boso tene un discussion mitar mundo sa hera ta ki color di panty bota bisti y tur bo storianan di bo failed relationship cu bo ex of bo dianan di studiante cu ta riba un diet di crackers bo tawata.
No tuma mi na malo. Amistad ta hopi importante, paso ami tin e privilegio di tin amistadnan di 10 te cu 15 aña largo. E tipo di amistad cu tawata cu bo den bon y den malo, cu a kere den bo habilidadnan hasta ora cu abo no tawata kere den bo mes, pero no tur cos cu pasa cu bo persona, bo tin cu comparti cu nan.
Pesey mi kier aconseja abo, cu lesando e articulo aki, pa tene cuenta cu ken bo ta comparti bo pensamentonan.
Si bo tey cumpra un cas, sera bo boca
Si bo tey haya un prestamo, sera bo boca
Si bo a haya e homber indica, sera bo boca
Si bo tey biaha, sera bo boca
Si bo tin un business adventure, sera bo boca
Si bo tin planes pa cuminsa un estudio, sera bo boca
Si bo tey cumpra un auto nobo , sera bo boca
No tur cos cu pasa cubo of bo ideanan, bo tin cu cana conta rond.
Tin biaha e ta un bon idea pa mantene sierto cosnan pa bo mes.
Porta asina bo lo tin hopi mas exito den bida.
Paso tur hende kier wak bo bon, pero no mihor cu nan.
Esey ta e realidad di bida.
Disclaimer: The views and opinions expressed in this blogpost are those of the author and do not necessarily reflect the official views of Phryme Magazine.