Hobenan rubiano organisando 'Creative meetups' na Amsterdam.
Recientemente a tuma lugar e tercer edicion di ‘Creative Meet up’ na Amsterdam, un reunion creativo unda cu a reuni varios hobenan pasiona den diferente area artistico; e.o. tipografia, fotografia y videografia. Un idea cu a cuminsa cu e hoben Kevin Rooi. Despues di a crea un base di fanaticada riba su Instagram account, @Typomento, Kevin a cuminsa recibi varios mensaje nan dor di su fiel seguidornan puntrando pa sera conoci cun’e, pero a la vez e mes a crea un gran interes pa sera conoci cu su seguidornan.
E interes pa sera conoci cu otro personan creativo p’e tambe ta importante, mirando cu “mi ta bira mas inspira y creativo rond di otro personan.” Kevin su idea tras di e ‘creative meet ups’ ta pa invita tur clase di persona creativo (y tamb’e esnan cu kier dijs haya sa mas) pa sera conoci cu otro, pa papia, comparti tips y ideanan cu otro y tambe habri porta pa posibel colaboracion hunto. Conhuntamente cu e vlogger rubiano, Nicole Manzo, Kevin a cuminsa expande e invitacion di e 'Creative meetups' nan aki p'asina poco poco hacie uno mas grandi.
“Nos kier pa mas hende creativo conecta cu otro, colabora y traha cu otro. Mas hende creativo nos conecta, mas cosnan extraordinario nos por crea.”
Kevin ta expresa cu cada reunion ta un sorpresa, paso bo nunca no lo sa ken lo asisti y tocante kico lo wordo papia. E por bira un reunion di amistades, ta papia tocante trabaonan realisa dor di esnan presente, ta habri oportunidad pa duna y recibi tips nan pa mehoracion y mas, “Bo nunca no sa precies tocante kico lo wordo papia, esey ta loke mas mi ta gusta di dje!”
Den e ultimo reunion na Amsterdam, e reunion creativo a conta cu e asistencia di Jan-Handrick ‘Front-Back developer, e talentoso y conoci director arubiano Mario Gonsalves, e diseñador grafico Valentino y Christopher; y sin exclui e 'vloggers' Nicole y Bibi-Jane. Tambe, pa prome biaha a haya un bishita di un persona cu no ta necesariamente Arubiano, Nando. Cual Kevin ta expresa cu ta haci e reunionan mas interesante, pa motibo cu e reunionan por bira mas diverso y multi-cultural.
E ambicion cu Kevin y Nicole tin pa cu e futuro di e reunion creativo nan aki, ta uno sumamente grandi pero no imposibel. Pa cuminsa, nan lo kier realisa e reunionan nan aki mas frecuentemente; posiblemente un of dos biaha pa luna. Con cu Kevin ta bibando actualmente na Groningen, e ta considerando muda na un lugar mas cercano di Amsterdam p’asina por compromete mas facilmente pa haci e reunionan. Como meta pa futuro, Kevin lo desea di mira e ‘creative meet ups’ nan aki bira un evento grandi un dia manera ‘Dutch Design Week’ of ‘Playgrounds’.
Si abo ta un persona bibando actualmente na Hulanda y ta desea di haya mas informacion tocante e reunion creativo aki of asisti na e siguiente ‘Creative meet up’, por tuma contacto cu Kevin Rooi y Nicole Manzo via nan plataforma social media, unda cu nan lo ta anunciando tur detayes di e siguiente 'Creative meetup'.
Disclaimer: The views and opinions expressed in this blogpost are those of the author and do not necessarily reflect the official views of Phryme Magazine.
📷: Nicole Manzo